༄༅། རིག་སྨོན་བསམ་གཏན་རྒྱ་མཚོ།

 

  ࿑    བོད་ཀྱི་ཡི་གེ་པ་རིག་སྨོན་བསམ་གཏན་རྒྱ་མཚོ་ལགས་ནི། སྤྱི་ལོ1977ལོར་མཚོ་ལྷོ་གསེར་ཆེན་རྫོང་སྐྱིད་ཉིན་ལུང་དཔོན་ཚང་དུ་སྐྱེས། མདོ་སྨད་བྱང་རྒྱུད་ཀྱི་ཆོས་གྲྭ་ཆེན་མོ་དཔལ་མི་འགྱུར་དྷཱིཿཚ་དགེ་ལྡན་བཀྲ་ཤིས་ཆོས་སྡིངས་གླིང་དུ་དགེ་བའི་བཤེས་གཉེན་མང་པོའི་མདུན་སར་བོད་ཀྱི་རིག་གནས་སྣ་ཚོགས་ལ་སྦྱངས་བརྩོན་ནན་མོ་བྱས། རང་ལོ་བཅོ་ལྔའི་སྟེང་ནས་བཟུང་བོད་ཀྱི་ཡིག་གཟུགས་སྣ་ཚོགས་ཀྱི་འབྲི་རྩལ་སོགས་ལ་འབད་བརྩོན་རྒྱ་ཆེར་བསྟེན། སྤྱི་ལོ1996ལོར་སྦྲང་ཆར་རྩོམ་སྒྲིག་ཁང་གི་སྐབས་གཉིས་པའི་ཐོན་མིའི་མཛུབ་རིས་མིང་ཅན་གྱི་བྱ་དགའ་ཐོབ། རྩོམ་ཡིག་ཁག་ཅིག་ལ་ཞིང་ཆེན་རིམ་པའི་བྱ་དགའ་ཐོབ་པ་དང་། རྩོམ་ཡིག་ཁག་ཅིག་ཞིང་ཆེན་རིམ་པའི་དཔེ་ཚོགས་སུ་ཡང་གདམས་ཐོན་བྱུང་། མི་ཡུལ་གྱི་ཟིན་ཐོ་ཞེས་པའི་ཁོའི་སྙན་ངག་རྩོམ་བཏུས་དང་། སྨྱུག་རིས་ཐོན་མིའི་ཕྱག་རྒྱུན་ཞེས་པའི་ཡིག་གཟུགས་དཔེ་དེབ་གཉིས་ཀྱང་། རིམ་པར་དཔེ་བསྐྲུན་འགྲེམ་སྤེལ་བྱས་པས་བོད་ཀྱི་སྤྱི་ཚོགས་སྟེང་དུ་དགའ་བསུ་ཆེན་པོ་ཐོབ། སྤྱི་ལོ1999ལོ་ནས་མདོ་སྨད་དྷཱིཿཚ་དགོན་ཆེན་ཆོས་རིག་རིན་ཆེན་སློབ་གླིང་གི་དགེ་རྒན་གྱི་འགན་བཞེས། མཚོ་སྔོན་ཞིང་ཆེན་རྩོམ་རིག་སྒྱུ་རྩལ་མཉམ་འབྲེལ་མཐུན་ཚོགས་ཀྱི་ཚོགས་མི། སི་ཁྲོན་ཞིང་ཆེན་སེར་ཤུལ་རྫོང་འབུམ་རྙིང་དགོན་ཤེས་རིག་སློབ་གླིང་གི་ཆེད་ཞུའི་དགེ་རྒན། མདོ་སྨད་དྷཱིཿཚ་དགོན་ཆེན་གྱི་བོད་ཀྱི་རིག་གཞུང་ཆེད་གཉེར་ཟབ་སྦྱོང་འཛིན་གྲྭའི་རྐང་འཛིན་དགེ་རྒན་བཅས་ཀྱི་ལས་འགན་གཅིག་ལྕོགས་སུ་བཞེས་ཡོད།གདན་ས་འདི་གའི་དགེ་བའི་བཤེས་གཉེན་བློ་བཟང་བྱང་ཆུབ་ཚང་གི་མདུན་ནས་བོད་ཀྱི་ཡིག་གཟུགས་དབུ་ཅན་དང་དབུ་མེད་ཀྱི་བྲིས་རྒྱུན་ཆ་ཚང་ཐོབ་ཡོད་པ་མ་ཟད། ཡིག་གཟུགས་འབྲི་རྩལ་ལ་བྱང་བའི་མཁས་པའི་དབང་བོ་ལྷ་སའི་ཡིག་མཁན་འགྱུར་མེད་ཚུལ་ཁྲིམས་དང་། མཁས་དབང་ཚེ་ཏན་ཞབས་དྲུང་། བླ་བྲང་དྲུང་ཡིག་སྨོན་ལམ། མཚོ་སྔོན་གྲགས་པ། བདེ་མཆོག་རྒྱལ་སོགས་གནའ་དེང་ཡིག་མཁན་རྣམ་པའི་ཡིག་གཟུགས་འབྲི་རྩལ་གྱིས་རྨང་བྱས་ཤིང་། ཁོའི་སྐྱེས་སྦྱངས་སོར་མོའི་འཇོན་ཐང་གིས་ཁ་བསྐངས་ཏེ་ཡིག་གཟུགས་འབྲི་རྩལ་ལ་ཕན་འབྲས་ངེས་ཅན་ཞིག་ཐོབ་ཡོད། སྤྱི་ལོ2013ལོར་ཁོའི་དཔེ་དེབ་གསུམ་པ་ཡིག་གཟུགས་ཀྱི་དེབ་དཔལ་ལྡན་ཐོན་མིའི་སྨྱུག་ཚོམས་ཞེས་པ་དཔེ་བསྐྲུན་འགྲེམ་སྤེལ་བྱས་ནས་བོད་ཁུལ་གྱི་དགོན་སྡེ་དང་སློབ་གྲྭ་ཆེ་འབྲིང་ཆུང་གསུམ་ཡོངས་ལ་བཀྲམསཡོད། ལོ་དེའི་ཟླ་བ་བདུན་པར་མཚོ་སྔོན་བརྙན་འཕྲིན་ཁང་གི་ཁ་བའི་ཞབས་རྗེས་ལེ་ཚན་ལས་ཆེད་དུ་བཅར་འདྲི་བྱས་ཤིང་བོད་ཀྱི་ཡིག་གཟུགས་སྐོར་གྱི་བཅར་འདྲི་དང་ལེན་བྱས་ཏེ་བོད་ཀྱི་ཡིག་གཟུགས་ཐད་ཀྱི་གཏམ་བཤད་གལ་ཆེན་གནང་ཡོད། ད་ལྟ་བོད་ཀྱི་སློབ་མ་རྣམས་ལ་ཡིག་གཟུགས་འབྲི་སྦྱོང་གི་ལས་ལ་ཉིན་མཚན་དབྱེར་མེད་དུ་ཧུར་བརྩོན་གནང་བཞིན་བཞུགས་ཡོད་དོ། །

 

བོད་ཀྱི་ཡི་གེ་པ་རིག་སྨོན་བསམ་གཏན་རྒྱ་མཚོ་ལགས་ཀྱི་ཡིག་གཟུགས་སྒྱུ་རྩལ་གདམས་བཀོད།